Ramazanin që po vjen besimtarët myslimanë në Kosovë do të kenë mundësi t’i falin namazet në xhami.
Objektet fetare islame sivjet nuk do të mbyllen për shkak të pandemisë COVID-19, siç ndodhi më 2020.
Kryeimami i Bashkësisë Islame të Kosovës, Vedat Sahiti, tha se duhet të respektohet distanca, mbajtja e maskës dhe dezinfektimi i duarve në të gjitha xhamitë.
Por BIK-u ka ndaluar disa organizime tjera kolektive.
“I kemi ndaluar iftaret në xhami dhe në publik. Çështjet e mësim-besimit do të organizohen në platforma online”, thotë Sahiti, njofton Klan Kosova.
Disa nga besimtarët thonë se falja në xhami mund të bëhet duke e ruajtur shëndetin publik.
Në masat e fundit të marra nga qeveria nuk është përfshirë mbyllja e xhamive. Por të premten policia gjobiti imamin e së fshatit Roganë, pasi që brenda xhamisë u falën më shumë se 10 persona.
