Asambleja e Përgjithshme e Komitetit Ndërkombëtar të Lojërave Mesdhetare (ICMG) dje vendosi që Kosova të bëjë organizimin e Lojërave Mesdhetare për vitin 2030 – “Prishtina 2030”.
Nga 66 delegatë sa ishin të pranishëm dje në Heraklion të Greqisë, 55 votuan pro Kosovës, tetë kundër dhe tre abstenuan.
Siç pritej, për këtë vendim erdhi kundërshtimi nga Serbia.
Komiteti Olimpik i Serbisë tha se ky vendim ishte skandaloz, derisa përmendën edhe praninë e kryeministrit Kurti kur u mbajt votimi.
“Në Kuvendin e sotëm pa lajmërim paraprak për delegatët është paraqitur dhe ka folur Albin Kurti. Komiteti Olimpik i Serbisë ka reaguar ashpër dhe insistoi që vendimi për pritjen e MI 2030 të merret pas Lojërave Olimpike të vitit 2024, gjë që është praktikë në këto raste. Kryesia e ICMI-së refuzoi ta votojë këtë propozim të Serbisë dhe kështu delegatët i vuri para një fakti të kryer. Pavarësisht se kandidatët e tjerë u tërhoqën dhe përkundër presionit të madh për të marrë vendimin unanimisht, organizimi i Lojërave Mesdhetare u dha, por me kundërshtim të fortë nga përfaqësuesit e Komitetit Olimpik të Serbisë, me 8 vota kundër. Komiteti Olimpik i Serbisë dënon ashpër këtë lloj ndërhyrje të politikës në sport”, thuhej mes tjerash në reagimin e Komitetit Olimpik të Serbisë.
Për këtë ka reaguar shefi i stafit të Presidencës, Blerim Vela, i cili ndërroi tekstin e një slogani nacionalist që ishte shfaqur së fundi në Serbi kundër Kosovës: “Kur ushtria serbe të kthehet në Kosovë”.
“Kur sportistët serbë garojnë në Lojërat Mesdhetare në Kosovë”, ishte teksti i modifikuar nga Vela për t’ia kujtuar Komitetit Olimpik të Serbisë që lojëtarët e tyre do të vijnë në Kosovë për këto lojëra.
“Mendoj se ka më shumë kuptim të thuhet: “Kur sportistët serbë garojnë në Lojërat Mesdhetare në Kosovë”. Në vend të thirrjes shoviniste për luftë të lyer me sprej nëpër Serbi!”, ka shkruar Vela në X, duke shpërndarë reagimin e Komitetit serb.
Pasi Kosova fitoi kandidaturën për organizimin e Lojërave Mesdhetare Prishtina 2030, kryeministri Albin Kurti e cilësoi këtë “ngjarja më e madhe sportive e mbajtur në Republikën tonë”.
“Ia dolëm! Faleminderit shumë. Ky është një lajm i madh për Kosovën dhe një arritje e jashtëzakonshme për të gjithë ne. Shpreh mirënjohjen time të përzemërt për të gjithë ata që kanë mbështetur vizionin tonë për të ardhmen e vendit dhe të gjithë rajonit të Mesdheut. E vlerësojmë me gjithë zemër mundësinë që na është dhënë që të bëjmë bashkë në vendin tonë, në Kosovë 26 shtetet anëtare nga tre kontinentet”, ka shkruar Kurti. /
