Për herë të dytë brenda 11 muajve të fundit, Dafina Gexha-Bunjaku është “shpërblyer” me një pozitë nga Albin Kurti, kryeministri i Kosovës.
Pasi në prill të vitit të kaluar ishte emëruar anëtare e bordit të përkohshëm të Agjencisë së Ushqimit dhe Veterinës (AUV), Gexha-Bunjaku është emëruar sot zëvendësministre e Shëndetësisë në qeverinë Kurti II.
Gexha-Bunjaku, e cila prej vitesh punon në Institutin e Shëndetësisë Publike, është bashkëshortja e Fatban Bunjakut, një funksionari të Lëvizjes Vetëvendosje. Bunjaku ka mbajtur disa funksione brenda LVV-së së Albin Kurtit. Aktualisht shërben si sekretar i një nënkomiteti të partisë.
Fatban Bunjaku, sikurse bashkëshortja e tij, gjatë mandatit të parë të qeverisë Kurti, ishte emëruar këshilltar politik në Ministrinë e Tregtise.
Përpos Dafina Gexha Bunjakut, pozitat politike në qeverinë Kurti janë mbuluar me emërime të të afërmve të funksionarëve të lartë të Lëvizjes Vetëvendosje në disa raste.
Ndërkaq, ministri i Shëndetësisë, Arben Vitia, ka emëruar për këshilltar të tij politik, Sami Ukën. Ky i fundit është vëllai i deputetit të Vetëvendosjes, Fitim Uka.
Sami Uka është kryeshef i Qendrës Kryesore të Mjekësisë Familjare në Prishtinë. Ai edhe gjatë vitit të kaluar kur Vitia ishte në krye të Ministrisë së Shëndetësisë, ishte këshilltar politik i tij.
