Ministri i Bujqësisë, Pylltarisë dhe Zhvillimit Rural, Faton Peci, pas raportimeve për ndarjen e granteve ka deklaruar vazhdimisht se “nuk e di kush merr grante” në Ministrinë e tij. Përveç granteve për vëllain e dajën e deputetes Fitore Pacollit, Periskopi ka raportuar se edhe këshilltari i Pecit, Naim Huruglica kishte marrë grant për projektin 100 mijë eurosh.
Tek rasti i fundit me këshilltarin e Pecit – Periskopi raporton se është bërë shkelje e Udhëzimit Administrativ në një rast ku Huruglica ka përfituar afro 19 mijë euro.
Ky medium thotë se ka siguruar dokumentet e projektit të Huruglicës dhe projektit të një biznesi tjetër që pronare ka Nora Ismailin nga Skenderaj, e cila nuk e kishte fatin e njëjtë si të këshilltarit të Pecit.
Në listën e investimeve të projekteve, të dy bizneset e lartpërmendura kanë kërkuar “Arka për vjelje”. Këshilltarit të Pecit, Naim Huruglicës iu pranua, ndërsa Nora Ismailit nuk iu pranua.
Mediumi ka publikuar dokumentin për projektin e Ismailit ku në listën e investimeve figuron “Arka për vjelje…”, por AZHB nuk e pranoi, pasi sipas Udhëzimit Administrativ, ky investim vlen vetëm për sipërfaqet 3 e më shumë hektarë.
Ndërsa në dokumentin tjetër, atë të projektit të Naim Huruglicës, pavarësisht që as ky nuk i ka pasur 3 apo më shumë hektarë, të njëjtit i pranohet ky investim i cili kushton afro 19 mijë euro.
PZHR 2023
U/A (MBPZHR)-Nr.14/2023 për masat dhe kriteret e përkrahjes për Zhvillim Rural për vitin 2023
NËNMASAT
III.I. SEKTORI I PEMËVE
Neni 8
Kriteret e pranueshmërisë
- Investimet e pranueshme në sektorin e pemëve:
1.1. Vetëm per siperfaqet 3 e me shume hektarë, u lejohen investime ne ndërtimin e objekteve për veprimet pas vjeljes, si depo ftohëse, makineri për klasifikim, pastrim, paketim, u lejohet edhe aplikimi për ndërtimin e objekteve për vendosjen e makinave, si dhe depove për produkte për mbrojtje të bimëve dhe për plehra artificiale.
Rast i parë 1
Iron Consulting LLC, Prishtinë, Kamenicë me pronar Naim Huruglica dhe Dardan Velia, i pranohet investimi;
Investimi
- Arka te plastikes per vjelje dhe ruajtje te frutave (350kg) 168 cope me vlere prej 18,508€
Rasti i 2
Agro Ndriqimi SHPK- Nora Afrim Ismaili, Kopiliq i Epërm Skenderaj
Investimi
Për projektin e Huruglicës 65 % e investimit prej afro 100 mijë eurosh është pranuar nga AZHB, teksa 65% e investimit prej afro 45 mijë eurosh është pranuar për projektin e Ismailit(pasi këtë nuk e financoi AZHB për investimin e arkave për vjelje).
Krejt në fund, duhet cekur se ministri Peci vazhdon që ta ketë të fshehur listën e përfituesve të granteve, pasi që nga viti 2019 ato nuk publikohen ne faqen e Ministrisë. Krejt kjo, jashteligjshëm.
