Agjencia Evropiane e Ilaçeve ka njoftuar se mund të ekzistojë lidhje mes vaksinës së kompanisë amerikane, “Johnson & Johnson”, dhe rasteve të rralla të mpiksjes së gjakut në venat e thella, duke rekomanduar që kjo dukuri të futet në listën e efekteve të mundshme anësore të vaksinës.
Pas takimit të Komisionit për Vlerësimin e Rrezikut, rregullatori tha të premten se tromboembolizmi venoz, problem i mpiksjes së gjakut potencialisht i rrezikshëm për jetën, duhet të shtohet në etiketën e vaksinës si efekt i rrallë i mundshëm.
Mpiksja bën që të formohet një dromcë në venën e këmbës, dorës ose ijeve, e cila më pas mund të lëvizë deri në mushkëri dhe ta ndërpresë furnizimin me gjak, shkruan RT.
Përpos shqetësimit rreth mpiksjes, Agjencia Evropiane e Ilaçeve rekomandoi që në listën e efekteve të mundshme të vaksinës të shtohet edhe trombocitopenia imunitare, çrregullim gjatë të cilit organizmi i sulmon gabimisht trombocitet e veta. I njëjti rekomandim u dha edhe për vaksinën e kompanisë “AstraZeneca”.
Pavarësisht rekomandimeve, rregullatori evropian nuk e ndryshoi vlerësimin e mëparshëm për rrezikun e mundshëm nga vaksina e kompanisë amerikane. Më parë, ky rregullator ka vlerësuar se vaksina e kompanisë “Johnson & Johnson” ka përfitime që peshojnë më shumë se çfarëdo rreziku i mundshëm, duke ua dhënë shteteve evropiane dritën e gjelbër për përdorimin e saj.
Duke u përgjigjur ndaj rekomandimeve të reja, kompania amerikane tha se do t’i përditësojë të dhënat për vaksinën, pro theksoi se gjasat që të shfaqen këto probleme janë shumë të ulëta.
