Kryetari i Prishtinës, Përparim Rama ka thënë se hapësirat publike pranë tregjeve do të lirohen – e afati është 22 korriku.
Komuna e Prishtinës ka ndërmarrë një varg aktivitetesh që kishin të bënin me rregullimin e qytetit dhe hapësirat publike.
Megjithatë, gjatë ditës, u njoftua se Burim Kelmendin, bordi e shkarkoi nga posti i kryeshefit ekzekutiv të Kompanisë Rajonale “Pastrimi”.
I pari i kryeqytetit foli për arsyet e shkarkimit të kryeshefit ekzekutiv të kompanisë “Pastrimi”, i cili mes tjerash, tha se kohëve të fundit gjendja në kryeqytet qe përkeqësuar dukshëm sa i përket pastrimit.
Rama, në intervistë për RTK-në, të premten ka sqaruar se gjendjen aktuale në të cilën gjendet kompania “Pastrimi”.
“Siç e keni parë, gjendja në kryeqytet është përkeqësuar muajve të fundit. E tillë ka qenë edhe më përpara. Kompania ‘Pastrimi’ është gjetur me probleme të shumta, me kredi, borxhe të shumta ndaj deponisë së mbeturinave, e me parregullsi në të punësuarit”, tha Rama.
“Për fat të keq, ka pasur shumë parregullsi. Prandaj, për këtë arsye Bordi ka marrë vendim që të shkarkohet kryeshefi i Kompanisë ‘Pastrimi’”, tha ai.
Rama më tej deklaroi se ka pasur tentativa edhe më herët për shkarkim të tij. “Por, për fat të keq kemi pasur sabotime të shumta nga personat e ndryshëm që kanë qenë në Bord”, tha ai.
Kryetari i Prishtinës u shpreh se aty do të vendoset tash për tash një ushtrues detyre.
Përveç kësaj, kryetari i Prishtinës foli edhe për njoftimin që e ka bërë Komuna për të gjithë shitësit që operojnë rreth hapësirave të tregjeve kurse në lagjen ‘Ulpiana’ u është dhënë afat deri me datën 22 korrik që t’i lirojnë ato hapësira.
“Është edhe kjo pjesë e procesit të lirimit të hapësirave publike dhe është vazhdimësi e çlirimit të tyre, ngase kemi numër të madh të shitësve ambulantë, të cilët shesin pa leje”, tha ai në RTK.
Kreu i kryeqytetit deklaroi se edhe pse ka hapësira edhe në Tregun e Gjelbër edhe në tregun e Ulpianës, e që ata mund të vendosen, të njëjtit vazhdojnë të tregtojnë jashtë hapësirave.
“Ndaj ne u kemi dhënë dy javë afat që ata të largohen, përndryshe do t’i largojmë ne dhe do t’i gjobisim”, ka thënë ai.
“Ata e kanë mundësinë të bëhen pjesë e sistemuar e mirëfilltë, sikurse tregtarët tjerë“, theksoi kryetari Rama, duke shtuar se do të bëhet edhe pastrimi i tregjeve nga mbeturinat.
