Më 17 tetor, Serbia dhe Kina nënshkruan një sërë marrëveshjesh, ndër të cilat më e rëndësishmja është Marrëveshja e Tregtisë së Lirë.
Marrëveshja u nënshkrua në Pekin, në prani të presidentit serb Aleksandar Vuçiq dhe presidentit kinez Xi Jinping.
Vuçiq tha në Instagram se Marrëveshja e Tregtisë së Lirë “hap pamje të reja” në marrëdhëniet mes dy vendeve.
“Ne po bëjmë përparim në të gjitha fushat në të cilat bashkëpunojmë. Iniciativa Brez dhe Rrugë i ka sjellë shumë të mira vendit tonë. Jam krenar për miqësinë tonë dhe rezultatet që kemi arritur”, ka shkruar Vuçiq së bashku me një foto të takimin me Xi.
Vuçiq falënderoi presidentin kinez “për angazhimin e tij personal” në forcimin e lidhjeve mes Serbisë dhe Kinës dhe qytetarëve të tyre.
Në Kinë, Vuçiq kryeson delegacionin serb në forumin ndërkombëtar “Belt and Road” dhe shoqërohet nga ministra të shumtë të qeverisë.
Në fillim të vizitës së tij në Kinë, Vuçiq theksoi se marrëveshja mes dy vendeve për tregtinë e lirë do të hyjë në fuqi në maj ose qershor të vitit të ardhshëm dhe theksoi “rëndësinë e saj të madhe për ekonominë serbe”.
Përveç kësaj marrëveshjeje, u nënshkruan disa dokumente bilaterale – për ndërtimin e më shumë rrugëve, parkun industrial serbo-kinez, blerjen e trenave, eksportin e mollëve, modernizimin e rrjetit fiks dhe bashkëpunimin kulturor.
Krahas takimit me Xi, Vuçiq pati edhe një sërë takimesh dypalëshe.
Për shkak të forcimit të bashkëpunimit me Kinën, ai është kritikuar vazhdimisht nga Brukseli dhe Uashingtoni.
Duke reaguar ndaj nënshkrimit të Marrëveshjes së Tregtisë së Lirë me Kinën më 17 tetor, Bashkimi Evropian njoftoi se Serbia, si kandidate për anëtarësim në BE, u zotua të tërhiqet “nga të gjitha marrëveshjet dypalëshe të tregtisë së lirë” në ditën e anëtarësimit në Union.
Një samit kinez me përfaqësues të 130 vendeve po mbahet në Pekin më 17 dhe 18 tetor, duke shënuar dekadën e Iniciativës Brez dhe Rrugë (BRI) – projekti kryesor gjeopolitik i Presidentit Xi Jinping për të zgjeruar shtrirjen globale të Kinës.
Në këtë event po merr pjesë edhe presidenti i Rusisë, Vladimir Putin, raporton Radio Evropa e Lirë.
