Senatori amerikan, Chris Murphy i cili ka qëndruar për vizitë zyrtare në Kosovë një ditë para tensioneve në veri të Kosovës, në një intervistë për “Atlantic Council”, ka folur për situatën aktuale në veri të vendit dhe për de-eskalimin e nevojshëm të situatës.
Në bisedë me Ilva Taren, Murphy ka thënë se Shtetet e Bashkuara të Amerikës s’janë të interesuar për veprime në veri të Republikës së Kosovës, që rrezikojnë jetën e ushtarëve të KFOR-it, në veçanti të ushtarëve amerikanë pa nevojë.
“Kurti eci përpara për të pasur zgjedhje, pati sens deri tek betimi. Por unë thjesht nuk besoj që ai duhej të shtynte kryetarët të kishin qasje në objektet e Komunave, gjë për të cilën Qeveria e Prishtinës e dinte që do të prodhonte një situatë, e cila do të mund të kthehej në situatë të dhunshme”, ka thënë Murphy.
Murphy ka deklaruar se vendimet që po i merr Kosova po vendosin trupat e NATO-s në rrezik pa nevojë dhe se nuk përkrahin diçka të tillë.
“Trupat e SHBA-së janë në Kosovë. Janë pjesë e forcës së NATO-s për të mbrojtur Kosovën. Unë mendoj se veprime e Prishtinës tani janë duke vendosur trupat e NATO-s në rrezik panevojshëm. Kjo është diçka që kongresistët s’do të ishin të interesuar asnjëherë, që trupat e NATO-s, ushtarët amerikanë të gjenden në në një rrezik të panevojshëm”, ka thënë Murphy./
