‘’Më shumë vaksina për të shmangur kufizimet”. Ishte ky mesazhi i samitit të ministrave të Shëndetësisë të G20-ës, të cilët u takuan në Romë për të diskutuar lidhur me pandeminë koronavirus.
Synimi i samitit është rritja e nivelit të bashkëpunimit dhe trajtimi me një front i sfidave shëndetësore në nivel ndërkombëtar. Ministri italian i Shëndetësisë dhe kryesuesi i samitit, Roberto Speranza, mirëpriti ministrat dhe delegacionet e tyre në seancën e parë të samitit dy-ditor, kushtuar ndikimit të Covid-19 në objektivat e zhvillimit të qëndrueshëm të agjendës 2030.
Sesionet e tjera do të përqendrohen në parandalimin dhe parapërgatitjen më të mirë për t’iu përgjigjur pandemive të ardhshme dhe identifikimin e strategjive më të mira të mundshme globale për të mbështetur zhvillimin dhe aksesin e barabartë në vaksina, terapi dhe diagnostikimin.
Ndërkohë, Samiti Global i Shëndetësisë në maj ka mbledhur në Deklaratën e Romës parimet që frymëzojnë luftën kundër Covid-19 dhe përgjatë kësaj rruge, ministrat e Shëndetësisë do të takohen përsëri me kolegët e Financave në fund të tetorit për t’u përballur me çështjen themelore se si të përforcohen arkitektura globale e shëndetit, raporton A2news.
G20 është forumi ndërkombëtar që bashkon ekonomitë kryesore të botës. Anëtarët e tij përbëjnë më shumë se 80% të PBB -së botërore, 75% të tregtisë globale dhe 60% të popullsisë së planetit.
Forumi mblidhet çdo vit që nga viti 1999 dhe përfshin, që nga viti 2008, një Samit vjetor, me pjesëmarrjen e krerëve përkatës të shteteve dhe qeverive.
