Ndiqeni mëposhtë mënyrën e saktë të përgatitjes së tyre dhe shijonini në shtëpitë tuaja.
A e dini se makaronat mund t’i shijoni fare mirë edhe të ftohta?
Nuk po flasim për mbetjet e ushqimit të një dite më parë, por për një recetë të mirfilltë të cilën e këshillojnë edhe shefat e kuzhinës.
Makaronat e ftohta janë një nga mënyrat më të mira e të shijshme për të kaluar vaktet e nxehta.
Përbërësit
500 gr makarona të vogla
300 gr pomodori
300 gr patëllxhanë
200 gr djathë kaçkavall
Borzilok
Majdanoz
Vaj ulliri
Kripë
Përgatitja
Për të nisur me përgatitjen e kësaj recete, përgatisni salcën shoqëruese të këtyre makaronave.
Filloni duke qëruar domatet nga lëkura dhe duke i larguar lëkurën dhe pjesën e farave të mesit.
Grijini të gjitha bashkë me borzilokun dhe majdanozin e më pas vendosini në një enë të thellë.
Shtoni aty edhe pak vaj ulliri dhe lërini të marinohen derisa të gjithë përëbërësit e tjerë të jenë gati.
Ndërkohë prisni në kubikë patëllxhanët dhe vendosini të skuqen në vaj ulliri, duke i shtuar në fund pak kripë dhe piper të bluar.
Teksa skuqen patëllxhanët, vendosni të ziejën edhe makaronat që keni përzgjedhur për këtë recetë.
Pasi t’i kulloni ato në fund lërini për disa momente të ftohen në temperaturë ambienti dhe bashkojini me salcën e domateve që përgatitët bashkë me patëllxhanët.
Shtoni pak vaj, djathë kaçkavall të grirë dhe lërini të ftohen në frigorifer në mënyrë që t’i konsumoni të ftohta.
Këtë pjatë mund ta lini në frigorifer të mbyllur edhe përgjatë natës dhe ta shijoni të nesërmen.
