Shtetasi gjerman Kevin Spanner është dënuar me tetë muaj burgim lidhur me aksidentin si pasojë e të cilit kishte humbur jetën tashmë i ndjeri V.V.
Aktgjykimi ndaj Spanner është shpallur të hënën nga gjykatësi i Gjykatës Themelore në Gjilan, dega në Kamenicë, Sadri Krasniqi, raporton “Betimi për Drejtësi”.
Gjykatësi Krasniqi gjatë elaborimit të këtij vendimi ka deklaruar se nga provat përkatëse, gjykata ka vërtetuar se përgjegjësia e shkaktimit të këtij aksidenti me fatalitet është e ndarë ndërmjet të akuzuarit dhe të tashmë të ndjerit V.V.
Pas shpalljes së këtij vendimi nga gjykatësi në fjalë, mbrojtësi i të akuzuarit Spanner, avokati Kujtim Kërveshi ka kërkuar nga gjykata që ndaj të mbrojturit të tij masa e paraburgimit t’i zëvendësohet me një masë tjetër alternative, respektivisht me masën e dorëzanisë.
Lidhur me propozimin e avokatit Kërveshi, gjykatësi Krasniqi ka thënë se gjykata do të vendos jashtë seancës me aktvendim të veçantë.
Prokuroria Themelore në Gjilan më 6 shtator të këtij viti ka ngritur aktakuzë ndaj Kevin Spanner, me arsyetimin se më 25 korrik të këtij viti, në aksin rrugor nga pika kufitare “Dheu i Bardhë” në drejtim të fshatit Crep të Ranillugut, duke drejtuar veturën “BMW G4Z”, nga pakujdesia dhe në kundërshtim me nenin 68 të Ligjit për rregullat e trafikut rrugor, me të arritur tek kryqëzimi në rrugën në fshatin Korminjan fillon tejkalim të pasigurtë, duke kaluar shiritin e majtë në vijë të plotë dhe me pjesën e parë të anës së djathtë të veturës e godet mbrapa motoçikletën të cilën ishte duke e drejtuar tashmë i ndjeri V.V.
Tutje, në aktakuzë thuhet se i ndjeri ka bërë kthim majtas të parakoshëm, pa e marrë harkun e paramenduar për në drejtim të fshatit Korminjan dhe si pasojë e kësaj, nga lëshimet e përmendura të të akuzuarit, përveç dëmeve materiale, në vend të ngajrjes ndërron jetë tani i ndjeri V.V.
Me këtë, Kevin Spanner akuzohet se ka kryer veprën penale “Rrezikimi i trafikut publik” nga neni 370, paragrafi 9 lidhur me paragrafin 6 dhe 1 të Kodit Penal, vepër kjo e dënueshme me burgim prej një deri në tetë vjet.
