Edhe tetë ditë kanë mbetur për të aplikuar në konkursin që u hap për pjestarët e komuniteteve pakicë për t’u bërë pjesë e Policisë së Kosovës.
Por askush deri më tani nuk e di se sa është numri i atyre që kanë aplikuar. E zyrtarët e rinjë policor nga komunitetet joshumicë po thirren për aplikim nga institucionet kosovare për të mbushur vendet bosh që janë në Drejtorinë Rajonale Mitrovicë Veri.
Kjo pas dorëheqjeve masive të qindra zyrtarëve policorë serb që u larguan nga ky institucion i sigurisë në nëntor të vitit të kaluar, si shenjë pakënaqësie me një vendim të Qeverisë lidhur me targat e makinave.
Zyrtarët policor në Kosovë po vazhdojnë me fushata sensibilizuese për t’i bindur komunitetet që të bëhen pjesë e Policisë së Kosovës.
“Policia e Kosovës vazhdon me kampanja sensibilizuese për konkursin e hapur për komunitetet pakicë Policia e Kosovës, përmes video mesazheve, fushatave sensibilizuese dhe takimeve zyrtare që po mbahen në të gjitha rajonet, vazhdon ti inkurajojë dhe ftojë qytetarët e të gjitha komuniteteve pakicë që të aplikojnë dhe të bëhen pjesë e Policisë së Kosovës. Këtë kampanjë e kanë përkrahur dhe mbështetur edhe personalitete të larta nga insitucione të ndryshme ndërkkmbëtare,”- u tha në njoftimin e Policisë.
Por askush deri më tani nuk e di se sa është numri i personave që kanë aplikuar për t’u bërë pjesë e Policisë së Kosovës.
Nga zyra për medie e policisë nuk japin detaje rreth shifrave.
“Siç jeni të informuar konkursi është hapur, përfshirë me kriteret që parashihen, ndërsa sa i përket procesit/çështjeve të mëtejme rreth konkursit në fjalë do të informoheni me kohë sipas planifikimeve/fazave që parashihen. Policia e Kosovës, çdo herë inkurajon dhe fton qytetarët që të aplikojnë dhe të bëhen pjesë e Policisë së Kosovës””, thuhet në përgjigjen e zyrës për media të Policisë.
Në anën tjetër nga Qeveria e Kosovës u tha se përmes këtij konkursi nuk synohet të përjashtohet asnjë serb i cili dëshiron që të jetë pjesë e Policisë së Kosovës. Sipas Qeverisë krejt çka nevojitet për këtë konkurs, – është thjeshtë plotësimi i kritereve të parapara.
Por, në konkurs një prej kritereve është që kandidatët të mos jenë mbi 30 vjeç.
Pse u shpall konkursi?
Autoritetet e drejtësisë në Kosovë këtë konkurs e hapën pasi rreth 550 pjesëtarë të komunitetit serb u larguan nga Policia e Kosovës në katër komunat në veri të shtetit nëntorin e vitit 2022.
Ata ishin në mesin e punëtorëve të sistemit të drejtësisë, institucioneve lokale dhe qendrore dhe të tjera, që u dorëhoqën në shenjë pakënaqësie me një vendim të Qeverisë së Kosovës, që kërkonte nga serbët të riregjistronin makinat me targa e Kosovës, dhe të largonin ato të lëshuara nga Serbia.
E zyrtar i policisë së Kosovës mund të bëhen të gjithë ata që I plotësojnë kushtet e vendosura nga institucionet kosovare.
Pjesëtarët e komunitetit serb në veri janë integruar në Policinë e Kosovës në bazë të Marrëveshjes së Brukselit ndërmjet Kosovës dhe Serbisë të vitit 2013, dhe shumica prej tyre tashmë janë mbi 30 vjeç.
Kujtojmë se që nga dorëheqja e zyrtarëve policorë serbë në katër komunat në veri – Mitrovicë e Veriut, Leposaviq, Zveçan dhe Zubin Potok – policia ka njoftuar se ka dërguar atje zyrtarë të rendit nga rajone të tjera.
