Fitore Pacolli, kryetare e Komisionit për Mjedis, Ushqim, Bujqësi, Planifikim dhe Zhvillim bashkë me deputetin Salih Zyba kanë takuar sot Kryetarin e Komunës së Prishtinës, Perparim Rama.
Siç ka bërë të ditur Pacolli, në këtë takim kanë paraqitur para Kryetarit shqetësimet që qytetarët e Komunës së Prishtinës kanë adresuar në Komision.
“Ne e njoftuam se Ndërmarrja Publike Prishtina Parking po shkel të drejtat e qytetarëve në baza ditore përmes veprimeve të jashtëligjshme. Veprimet e “Prishtina Parking” bien në kundërshtim me Ligjin për ndërtesat e banimit në bashkëpronësi”, ka shkruar ajo në ‘Facebook’.
Mes tjerash, ka bërë të ditur se kanë kërkuar që urgjentisht të ndërpritet shfrytëzimi i hapësirave rezidenciale për përfitim të shumëfishtë.
“Prishtina Parking përfiton pagesë nga banorët rezidencial dhe në të njëjtën kohë i lëshon ato për shfrytëzim për ata jorezedencial. Parking Prishtina në mënyrë të jashtëligjshme përfiton nga të dy palët”.
Po ashtu, Pacolli ka njoftuar se kanë kërkuar të ndërpritet shqiptimi i dënimeve, vendosja e bllokadave, konfiskimi i veturave nga Prishtina Parking dhe pranimi i pagesës së dënimeve me para në dorë pa u definuar saktë kompetencat e Prishtina Parking.
“Prishtina Parking përfiton para nga këto dënime ndërsa transparenca se ku përfundojnë këto para është zero. Ne kërkuam që të pezullohet zgjerimi i Prishtina Parking deri në përmirësimin e mangësive dhe ndryshimin e rregullores”.
Po ashtu ka bërë të ditur se kanë kërkuar nga Rama të iu ofrojë qasje në këto dokumente:
- Autorizimin për bllokimin dhe e veturave me të cilin vepron “Prishtina Parking”;
- Rregulloret e brendshme të ndërmarrjes;
- Të gjitha dokumentet nga Drejtoria e Kadastrit që vërtetojnë të gjitha parcelat për shfrytëzimin e hapësirave nga “Prishtina Parking”;
- Dokumentat që definojnë karakterin e rrugës “B”, në veçanti shiritat anësor.
“Kryetari pranoi kërkesat tona dhe na premtoi se shqetësimet e qytetarëve do të adresohen”.
