Tragjedia u bë edhe më e dhimbshme kur dje në Ibër-Lepenc u gjet trupi i pajetë i një i 4-vjeçari, sepse edhe në maj të vitit të kaluar kishte humbur jetën një tjetër fëmijë 9-vjeçar. Kanali i Ibër-Lepencit ndër vite ka marrë jetëra njerëzish, prandaj kërkohet që të gjendet ndonjë zgjidhje në mënyrë që të rritet siguria përreth.
Daja i 4-vjeçarit u tha mediave se nipi i tij ka rrëshqitur në kanal, teksa apelon nga autoritetet që të bëhet “një lloj mbrojtje në kanal”, sepse shprehet se në të ardhmen mund të ketë sërish vdekje.
“E kanë marrë lopën së bashku me një nip të vetin, djalin e hallës. Ka dalë me një nip të vetin, edhe djali u afru aty, ka rrëshqit edhe ka ra…Kisha apelu me qit ndonjë lloj mbrojtje te kanali. Unë jam daja i djalit. Motra nuk është mirë, po mundohemi me qetësu”, u shpreh ai në një paraqitje para mediave.
Një vit më parë, në Ibër-Lepenc, u mbyt edhe një fëmijë 9-vjeç.
Axha i 9-vjeçarit kishte deklaruar se fëmija kishte dalë për të luajtur.
“Ka qenë më fëmija tu lu dhe ata thonë që u ra në ujë. Nuk është koha për mu la dhe na dyshojmë që tjetër është se s’ka mund dje më hy mu la pasi u kanë tu ra shi. Neve na ka ardhë lajmi si ka vdekur nga Polica e Kosovës”, kishte deklaruar axha i të miturit
Kanali ku ishte gjetur trupi i 9 vjeçarit gjendet disa kilometra larg shtëpisë së familjes Deliu në Vaganicë të Mitrovicës.
Kryetari i Vushtrrisë, Ferit Idrizi, në një lidhje direkte për “Frontal” në T7 është shprehur i tronditur nga vdekja e 4-vjeçarit.
Gjithashtu paralajmëroi se do ta ngris në nivel komunal mënyrën e “sigurimit të kanalit”.
“Kanali i Ibër Lepencit ka ditur shpesh të marrë jetëra të banorëve të Vushtrrisë, fëmijëve”, tha ai, duke thënë se do ta ngris në nivel komunal “mënyrën e sigurimit të kanalit”.
“Është një moment i rëndë jo vetëm për familjen”, tha kryetari i Vushtrrisë të martën për “Frontal”.
Lidhur me kërkesat për rritjen e sigurisë, Gazeta Express ka telefonuar disa herë kryeshefin ekzekutiv të Ndërmarrjes Publike “Ibër-Lepenc”, Faruk Mujka, por i njëjti nuk është përgjigjur.
As Policia e Kosovës nuk ka kthyer përgjigje për numrin e viktimave që janë shënuar në Ibër-Lepenc gjatë tri viteve të fundit.
Forca e Sigurisë së Kosovës njoftoi të martën se ka arritur ta gjejë pa shenja jetë trupin e fëmijës katërvjeçar i cili kishte rënë në kanalin e Ibër-Lepencit në Mitrovicë.
Fëmija ishte i raportuar i zhdukur, ndërsa trupat e FSK-së kanë dalë në vend ngjarje për ta gjetur të miturin.
Policia konfirmoi se fëmija u gjet në fshatin Bukosh. /G
