Ish-ambasadori i Kosovës në Francë, Qëndrim Gashi, që së fundmi është nderuar me urdhrin Komandant i Legjionit të Nderit nga presidenti francez Macron, ka folur për procesin e liberalizimit të vizave.
Gashi në emisionin “Personale” në RTV Dukagjini ka thëne se Kosova e ka humbur një momentum për vizat.
Për fat të keq ka pasur një tejpolitizim të procesit. Në vitin 2016 ne humbëm rastin për të marrë vizat bashkë me Ukrainën dhe Gjeorgjinë por pati dhunë në parlament dhe e humbëm rastin”, tha ai, përcjell Telegrafi.
Gashi ka thënë se Franca vazhdon të jetë një prej vendeve hezituese sa i përket liberalizimit të vizave për Kosovën.
“Në Francë ka mbizotëruar ideja se nëse hapen dyert e Schengenit për shtetasit e Kosovës, do të kishte migrim masiv dhe do të paraqiteshin kërkesa të mëdha për azil, ku në Francë do të paraqiteshin probleme të brendshme politike”, deklaroi Gashi.
Ish-ambasadori i Kosovës në Francë thotë se në një moment Kosova nuk i plotësoi kushtet, por sipas tij më pas faji mbetet i BE-së për mos liberalizim të vizave.
“Zakonisht janë rrethanat, koha, lidershipi ato që shtyjnë procese”, deklaroi tutje Gashi.
