Një fenomen mjaft shqetësues për qytetarët e Kosovës janë bërë vjedhjet e shpeshta nëpër shtëpi, që po shkaktojnë ankth e pasiguri, sidomos kur shtëpitë mbesin pa përkujdesje,
Kështu e ka pësuar mbrëmë edhe familja Tashevci në Prishtinë, pasi persona ende të paidentifikuar kanë hyrë brenda shtëpisë së tyre në rrugën ‘Laura Shamani’.
Burimet e GS kanë bërë me dije se pronari i shtëpisë ka kërkuar ndihmën e Policisë, pasi ka vërejtur se hajnat kanë vjedhur para të gatshme dhe stoli ari.
Bazuar në dëshminë e tij, të dyshuarit kanë arritur që të vjedhin hiç më pak se 45 mijë euro para të gatshme, disa qindra franga zvicerane dhe stoli ari në vlerë të rreth 3 mijë eurove.
Njësitë policore kanë dalë në vendin e ngjarjes, ku kanë kryer ekzaminimet e nevojshme që ndihmojnë në zbardhjen e rrethanave të rastit dhe identifikimin e personave të dyshuar.
Me urdhër të prokurorit, rasti është iniciuar ‘Vjedhje e rëndë’, ndërsa veprimet tjera ligjore do merren posa të kapen të dyshuarit.
