Autoritetet palestineze të mbrojtjes civile në Rripin e Gazës thanë të hënën se tani kishin zbuluar 210 trupa nga një varrim i përkohshëm brenda spitalit kryesor në qytetin jugor të Khan Younis.
Associated Press raporton se zona e varrimit në spitalin Nasser u ndërtua kur forcat izraelite po rrethonin objektin muajin e kaluar. Në atë kohë, njerëzit nuk ishin në gjendje të varrosnin të vdekurit në një varrezë dhe gërmuan varre në oborrin e spitalit, tha grupi i mbrojtjes civile.
Në një deklaratë, departamenti tha se gjithsej 210 trupa janë nxjerrë nga oborri i spitalit që nga e premtja.
Ai tha se disa nga trupat ishin të njerëzve të vrarë gjatë rrethimit të spitalit. Të tjerë u vranë kur forcat izraelite bastisën spitalin, gjithashtu muajin e kaluar.
Pasi ushtria u tërhoq nga Khan Younis në fillim të këtij muaji, banorët janë kthyer në vend në kërkim të trupave të të dashurve të tyre me qëllim që t’i varrosnin në varre të përhershme diku tjetër.
