I Dërguari i Britanisë së Madhe për Ballkanin Perëndimor, Stuart Peach, ka thënë se është i zhgënjyer në autoritetet e Kosovës që nuk ka mundur të gjendet një zgjidhje që do të lehtësonte votimin e serbëve të Kosovës në zgjedhjet nacionale të Serbisë.
Në një intervistë për medium malazez Vijesti, Peach ka thënë se është e qartë që Kosova ka të drejtë për të vendosur nëse një votim i tillë mbahet në territorin e saj, por ka shtuar se një refuzim i tillë e ka vënë në pikëpyetje përkushtimin e vendit për vlerat demokratike për të gjithë qytetarët e saj.
“Isha i zhgënjyer nga lajmi se autoritetet në Kosovë refuzuan propozimin për një zgjidhje kompromisi për të lehtësuar votën e serbëve të Kosovës në territorin e Kosovës gjatë zgjedhjeve të ardhshme në Serbi. Ndërsa është e qartë se Kosova ka të drejtë sovrane për të vendosur nëse një votim i tillë do të ndodhë, mosshfrytëzimi i rastit për të arritur zgjidhjen praktike të ofruar në këtë rast vë në pikëpyetje përkushtimin e Kosovës ndaj vlerave themelore të gjithëpërfshirjes dhe të drejtave demokratike për të gjithë qytetarët që jetojnë atje”, ka thënë ai.
Peach ka folur edhe për dialogun Kosovë-Serbi, për të cilin ka thënë se ka vetëm një mënyrë të arrihet një zgjidhje dhe ajo është përmes dialogut të ndërmjetësuar nga BE-ja.
“Ka vetëm një mënyrë që Serbia dhe Kosova të arrijnë një marrëveshje për normalizimin e marrëdhënieve, ajo është përmes një dialogu të ndërmjetësuar nga BE. Mbretëria e Bashkuar e ka mbështetur gjithmonë këtë proces dhe unë personalisht, si i dërguar, punoj ngushtë me Përfaqësuesin Special të BE-së, Miroslav Lajçak, i cili është përgjegjës për dialogun”, ka thënë ai.
“Megjithatë, duhet të kemi parasysh se në fund të fundit ky proces u përket këtyre dy vendeve. Ata duhet të bashkëpunojnë në interes të popullit të Kosovës dhe të Serbisë, për të arritur një marrëveshje gjithëpërfshirëse, përfundimtare, ligjërisht të detyrueshme dhe të qëndrueshme, e cila është e pranueshme edhe për bashkësinë ndërkombëtare. Është e qartë se gjetja e një zgjidhjeje është në interes dhe kontribuon në sigurinë e të gjithëve në rajonin më të gjerë. U bëj thirrje liderëve të të dyja palëve që të angazhohen në negociata me gjithë zemër dhe në mënyrë konstruktive.”, përfundoi Peach.
