Kosova po përballet me një valë të re të Covid-19 ku mbizotërues është varianti ‘Delta’ i cili po shkakton shumë viktima.
Vetëm gjatë 24 orëve të fundit në vendin tonë kanë humbur jetën nga Covid, 12 persona si dhe kanë rezultuar pozitivë 1 mijë 278 të tjerë.
Për shkak të situatës së rënduar, kryetari i Prishtinës Shpend Ahmeti, propozoi mbyllje dyjavore të vendit.
“Tash është vonë për kozmetikë. Masat si ajo me Shqipërinë vetëm irritojnë dhe nuk janë zgjidhje për këtë situatë.1. Mbyllje dyjavore më e rreptë për ta ngadalësuar përhapjen – me grante për biznese” deklaroi dje Ahmeti përmes një shkrimi në rrjetin social Facebook.
Por ky propozim i Ahmetit po kundërshtohet ashpër nga kryetari i Federatës Sindikale të Shëndetësisë, FSSHK-së, Blerim Syla.
Ai tha se shkalla e inkubacionit të çdo infeksioni është 21 ditë.
“Jo nuk mendoj se mund ta rregulloj situatën një mbyllje totale e vendit. Jam kundër argumentit të Shpend Ahmetit, sepse këto argumente është dasht më herët t’i japë kryetari i Prishtinës, gjithçka është vonë. Shkalla e inkubacionit të çdo infeksioni është 21 ditë dhe këto lojëra politike më së paku i takojnë Shpend Ahmetit edhe të tjerëve me dhanë kështu deklaratsh”, tha ai.
Ai tutje theksoi se ekspertët shëndetësorë në vend s’duhet të jenë pjesë e politikës, dhe janë ata që duhet të dalin me konkluzione dhe jo Shpend Ahmeti.
“Kishte me qenë e mirë, që ekspertët tanë me në krye me Naser Ramadanin, Lul Rakën etj, të mos jenë pjesë e politikës, që të dalin me konkluzion. Nuk na takon as Shpend Ahmeti dhe as askujt që të japim mendime të tilla. Eshtë kundërshtim i plotë ajo që po thotë zoti Ahmeti” tha Syla.
Numri i vdekjeve nga Covid është rritur ndjeshëm në vendin tonë.
Covid-19 dhe kryesisht varianti ‘Delta’ po prek moshat e reja ç’ka ka për pasojë po i’u sjell edhe vdekjen.
Sot humbi jetën një person i moshës 28 vjeçare, 1 i moshës 30-39 vjeç, 1 i moshës 40-49 vjeç, pesë persona të moshës nga 50-59 vjeç, tre persona të moshës nga 60-69 vjeç, shtatë persona të moshës 70-79 vjeç dhe tre persona mbi 80 vjeç.
