Tekniku i rrjetit të ujërave të zeza në KRU “Prishtina”, Valmir Morina, thotë se i gjithë sistemi i ujërave atmosferikë në kryeqytet është i futur në atë fekal dhe janë të përziera e që nuk lejohet.
Ai si i ftuar në emisionin festiv “Ju flet Prishtina” tregoi se gypat janë të ngushtë, derisa thotë se është papërgjegjësi e qytetarëve që hedhin mbeturina të ngurta dhe inerte në puseta.
“Më shumë hedhin pallomat e lagura e që janë kancer për rrjetin e sistemit të ujërave të zeza. Ka edhe tepihë, kauçë, jorganë, jastëkë, pjesë të veturave, goma, maska, ndonjë pjesë e asfaltit derisa ndodh edhe që kompanitë e papërgjegjshme të hedhin nëpër puseta material ndërtimor pasi t’i kryejnë punimet”.
Ai tha se edhe mbetjet e kafshëve hidhen në puseta, derisa ka ndodhur që punëtorët gjatë pastrimit të një pusete në lagjen “Vneshta” ta gjejnë edhe një shporet të druve i cili ka qenë i deformuar.
“Mund të them se 50% të rasteve te ndërtimet e reja sistemi i ujërave të zeza ka qenë për shtëpi kolektive e që tash shfrytëzohet për ndërtim të lartë, pa asnjë investim në të. Gypat janë të diametrit të vjetër, numri i banorëve është shtuar, po ashtu pusetat janë punuar pa standarde dhe nuk e kanë nivelin e rënies sa duhet e as nuk kanë izolim sa duhet”.
Morina tregoi se nëse ka edhe reshje atmosferike ndodh që brenda muajit të intervenojnë deri në 600 raste vetëm në qytetin e Prishtinës për zhbllokime të pusetave të ujërave të zeza.
Ai kërkoi nga qytetarët që mbeturinat të hidhen në vendet e caktuara e jo në rrjetin e ujërave të zeza sepse, siç tha, kjo shkakton shumë probleme.
