Përfaqësuesja e Futbollit e Kosovës pritet të ketë një trajner të ri në fillim të vitit të ardhshëm.
Ky objektiv është vënë në mbledhjen e Komitetit Ekzekutiv të Federatës së Futbollit të Kosovës.
Në njoftimin e gjatë të Federatës, ku flitej për të gjitha pikat e diskutuara në mbledhje, shkruhej se:
“KE diskutoi dhe trajtoi një varg emrash mjaft të mirë për postin e përzgjedhësit të ekipit përfaqësues A, pas shkëputjes së bashkëpunimit me përzgjedhësin Challandes. Në këtë drejtim KE me kujdes të veçantë do të shqyrtojë dhe analizojë çdo kandidaturë të mundshme në mënyrë që në fillim të vitit të ri FFK-ja ta ketë njeriun e duhur që do ta drejtojë ekipin A.”
Kujtojmë që Bernard Challandes u shkarkua nga detyra më 13 tetor, për shkak të rezultateve të dobëta. Në dy ndeshjet e fundit të “dardanëve” në eliminatoret e Botërorit kundër Gjeorgjisë (1-2) dhe Greqisë (1-1) në stol përkohësisht ishte slloveni Primozh Gliha, por shumë shpejt Kosova do të ketë një emër të ri si trajner.
