Sot në mbledhjen e Komisionit Qendror të Zgjedhjeve është diskutuar edhe për votat e ardhura nga diaspora. Përfaqësuesi i PDK-së në këtë institucion ka ngritur dyshime rreth këtyre votave duke thënë se janë plotësuar nga vetëm një person. Ndërkohë të gjitha partitë unanimisht kanë kërkuar verifikimin e tyre.
Ndërkohë zëdhënësi i KQZ-së, Valmir Elezi, ka treguar se numërimi i votave të diasporës do të fillojë sot në orën 18:00, derisa ka bërë të ditur se numërimi i votave për Dragash, Junik dhe Mamushë do të bëhet në prezencë të mediave për shkak të dyshimeve të ngritura.
“Ju njoftoj se në orën 18:00 do të fillojë numërimi i votave të ardhura me postë. Ftojmë mediat për të përcjellur këtë aktivitet të KQZ-së”, ka thënë Elezi.
Dragashi, Juniku dhe Mamusha janë tri komunat ku votat e disaporës mund të çojnë në ndryshim rezultati, meqë distanca mes kandidatëve pas balotazhit është shumë e vogël.
Zëdhënësi i KQZ-së sot kishte dhënë detaje rreth numrit të votave nga diaspora.
“Gjatë ditës së martë, 16 nëntor, Komisioni Qendror i Zgjedhjeve do të fillojë me numërimin e fletëvotimeve të cilat janë dërguar nga jashtë Kosovës gjatë periudhës së votimit, 29 tetor – 12 nëntor. Tashmë shërbimi votues i KQZ-së ka bërë vlerësimin e 1,571 pakove të supozuara me fletëvotime të ardhura përmes postës. Nga procesi i vlerësimit, del se nga këto pako numri i zarfeve të individualizuara me fletëvotime është 2,658, prej të cilave janë aprovuar 2.379, ndërsa pasi nuk kanë plotësuar kriteret ligjore janë refuzuar 279 pako. Këto fletëvotime u takojnë komunave 19 komunave të ndryshme”, ka treguar Elezi.
