Driton Ajazi nga Demokratët për Drenasin dhe Ramiz Lladrovci nga PDK, në emisionin Frontal në T7, kanë zhvilluar një debat të ashpër duke tentuar të paraqiten si kandidatë të PDK-së në Drenas.
Ajazi është përkrahur fillimisht nga Dega e PDK-së në Drenas, por kryesia e PDK-së vendosi që ta kandidojë Lladrovcin. Rrjedhimisht, Ajazi po kandidon nga Demokratët për Drenasin.
Ajazi tha se struktura e PDK-së është rreshtuar pas tij, madje tha se ADN-ja e PDK-së është me të.
“Struktura e PDK-së është rreshtuar pas meje. Lladrovci nën logo, ndërsa unë në shpirtin e saj – unë, pra ADN-në e PDK-së unë”, është shprehur Ajazi.
Lladrovci tha se për shkak të akuzës nga Ajazi si uzurpator, ka vendosur t’ia lejojë Ajazit zyrat e PDK-së në Drenas, e në fakt nuk ishte i gatshëm të përgjigjet nëse përfaqëson PDK-në.
“z. Ajazi më ka quajtur mua uzurpator. Nëse do të isha i tillë, do t’i kryeja aktivitetet e mia në zyrat e PDK-së. Ato zyra ia kam lënë Ajazit për t’i treguar që s’i kam uzurpuar ato”, ka thënë Lladrovci.
“A jam PDK-së a s’jam, e thotë elektorati i Drenasit”, shtoi Lladrovci.
