Sot, zëvendësministri Blerim Sallahu, vizitoi Qendrën Korrektuese në Gjilan ku u prit në takim nga drejtori i Qendrës, z. Shefik Sylejmani, zëvendësdrejtori z. Fidan Hasani dhe Mbikëqyrësi i sigurisë, z. Agron Maliqi.
Zëvendësministri Sallahu u njoftua nga afër me situatën e burgut dhe të burgosurve në këtë Qendër Korrektuese.
Në këtë takim zëvendësministri theksoi edhe njëherë gatishmërinë dhe përkushtimin e Ministrisë së Drejtësisë për adresimin e çdo kërkese ligjore që për qëllim ka rritjen e sigurisë, përmirësimin e kushteve të punës për stafin, efikasitetin dhe efektivitetin.
Gjatë vizitës në hapësirat e Qendrës Korrektuese, zëvendësministri Sallahu takoi oficerë dhe punëtorë civil e shëndetësorë, të cilët i njoftoi se Ministria e Drejtësisë së shpejti do të procedojë në Qeveri pakon ligjore për Shërbimin Korrektues, pako e cila ka për qëllim të rregullojë statusin e stafit korrektues, të përmirësojë masat që kanë të bëjnë me risocializimin, riintegrimin dhe pjesëmarrjen aktive në shoqëri të të burgosurve.
