Antonio Cassano ka thënë se Italia ia doli ta fitojë Kampionatin Evropian 2020 pa sulmues, duke mos i llogaritur fare Ciro Immobilen dhe Andrea Belottin.
Italia e mposhti Anglinë në një ndeshje dramatike me penallti 3:2 në finale të Euro 2020 të dielën vonë, pasi koha e rregullt dhe vazhdimet mbaruan baras 1:1.
Gianluigi Donnarumma ishte heroi i Italisë pasi i priti tri prej pesë goditjeve të anglezëve para 66 mijë tifozëve në Wembley, për ta kthyer titullin evropian në Itali pas plot 53 viteve.
Italia i shënoi 13 gola në shtatë ndeshje, që është rekord i ri për të kaltrit në një turne të madh.
Immobile i shënoi vetëm dy prej tyre. Ndërsa, Belotti nuk e shënoi asnjë gol, pasi ka luajtur si rezervist.
Ish-sulmuesi i Italisë, Interit dhe Milanit, Cassano beson se Immobile ishte vetëm numër.
“Ne e kishim një problem të madh, u bëmë kampionë të Evropës, megjithëse nuk e kishim një sulmues”, tha Cassano për Bobo TV.
“Ky është fakt. Është diçka e veçantë, por trajneri meriton lëvdata që ka thënë qysh nga konferenca e parë se do të shkojë në Euro për ta fituar trofeun”, shtoi ai.
Immobile i ka shënuar 15 gola në 52 ndeshje për Italinë në karrierën e tij deri tani. Në Euro 2020 ndërkohë, ai shënoi kundër Turqisë dhe Zvicrës në fazën grupore.
Sulmuesi i Lazios ishte i pavërejtur në ndeshjet tjera kundër Austrisë, Belgjikës, Spanjës dhe Anglisë
