Kryetari i Kuvendit të Kosovës, Glauk Konjufca, ka mbajtur një fjalim me rastin shënimit të 31-vjetorit të miratimit të Deklaratës Kushtetuese të 2 Korrikut 1990.
Ai tha se 2 korriku është momenti kyç i shprehjes së vullnetit të popullit shqiptar të Kosovës.
“Jemi mbledhur bashkë për ta shënuar një datë të rëndësishme për historinë dhe shtetndërtimin e Kosovës. Me 2 korrik të vitit 1990, delegatët e zgjedhur të Kuvendit të Kosovës e shpallën atdheun tonë Republikës. Në atë kohë ky ishte akti më i rëndësishëm i përfaqësuesve të popullit qysh pas konferencës së Bujanit. Para dyerve të Kuvendit të sotshëm, delegatët e Kuvendit të atëhershëm e votuan deklaratën e 2 korrikut të cilën e lexoi Muharrem Shabani”.
“Kjo shpallje ndodhi në okupim, vendi ynë ishte i pushtuar dhe nën masat e ashpra të regjimit të Serbisë dhe Jugosllavisë të asaj kohe. Një popull i tërë u bë cak i ndëshkimeve të ashpra, burgosjeve të vazhdueshme, dhunës policore, vrasjeve në ushtri e qindra vrasjeve të qytetarëve në protesta dhe demonstrata”, tha kryekuvendari.
Mes tjerash, Konjufca tha se delegatët e 2 korrikut ishin mishëruesit e vërtetë të vullnetit kolektiv të popullit tonë për liri dhe të drejtën e vetëvendosjes.
“2 korriku është momenti kyç i shprehjes së vullnetit të popullit shqiptar të Kosovës. Përmes shpalljes së Kosovës Republikë e pavarur nga Serbia, delegatët e 2 korrikut ishin mishëruesit e vërtetë të vullnetit kolektiv të popullit tonë për liri dhe të drejtën e vetëvendosjes. Mbi supët e tyre peshonte aspirata e kamotshme e popullit tonë”.
Tutje, kryekuvendari tha se 17 shkurti i vitit 2008 i ka rrënjët në 2 korrikun e vitit 1990.
“Sa e gjatë dhe e vështirë ishte përpjekja jonë për liri e pavarësi dhe sovranitet. Ishte një punë titanike e plot e plot brezave të mbushur me sakrifica të panumërta gjatë të cilave një popull i tërë nuk kurseu asgjë për t’u çliruar. Lufta e drejtë dhe rënia e dëshmorëve e martirëve ja dhanë vulën lirisë sonë mbi të cilën s’ka më kompromise të mëtutjeshme”, tha Konjufca, njofton Klan Kosova.
