Më shumë se 200 mijë familje dhe biznese australiane janë ende pa energji përgjatë bregut lindor të vendit, pasi cikloni Alfred goditi disa pjesë të Queensland dhe Uellsit të Ri Jugor sot me shira të rrëmbyeshëm, raporton A2 CNN.
Edhe pse stuhia dobësohet, autoritetet kanë lëshuar një seri paralajmërimesh për përmbytje dhe mot të rëndë për një shtrirje prej 400 kilometrash në shtetin lindor.
Cikloni tropikal solli 30 centimetra shi në 24 orë në kryeqytetin e Queensland, Brisbane, tha byroja kombëtare e motit, shkruan A2 CNN.
Disa rrugë në qytetin me 2.5 milionë banorë u përmbytën, duke lënë të bllokuara makina të zhytura në ujë në zonat më të goditura, treguan imazhet e publikuara në mediat australiane. Shërbimet e urgjencës shpëtuan 17 persona në Queensland gjatë natës së të dielës deri të hënën, tha kryeministri i shtetit David Crisafulli, përcjell A2 CNN.
Shërbimet publike thanë se më shumë se 210,000 shtëpi dhe biznese ishin ende pa energji në Queensland dhe 10,000 të tjera në Uellsin e Ri Jugor.
