Lëvizja Vetëvendosje tashmë ka nisur fushatën e saj me bashkatdhetarët. Përvec njoftimeve nëpër faqet zyrtare të Ambasadave të Kosovës për takimet që kryeministri i Kosovës Albin Kurti organizon me mërgatën, kjo lëvizje ka ndërmarrë edhe një veprim të ri.
Duket se numri i vogël i kosovarëve që jetojnë jashtë shtetit, ka ndezur motorët e partisë në pushtet.
Lëvizja Vetëvendosje ka dalë me një njoftim publik duke treguar se në Gjermani kanë hapur pika informuese për bashkatdhetarët që duan të marrin informacione për procesin e regjistrimit për votim.
“Qendra e Lëvizjes VETËVENDOSJE! në Gjermani ka hapur pika informuese ku bashkatdhetarët tanë mund të informohen mbi procesin e regjistrimit për votim. Bashkëlidhur gjeni listën e qyteteve, oraret dhe kontaktet e personave përgjegjës për më shumë informacione. Regjistrohu dhe shfrytëzoje të drejtën tënde për votim!”, thuhet në njoftimin e VV-së në Facebook.
Ndryshe, sipas të dhënave zyrtare deri javën e kaluar janë regjistruar rreth 14 mijë persona që jetojnë në diasporë, prej të cilave janë aprovuar 13,033, ndërsa 988 të tjera janë refuzuar.
