Ministri i Mbrojtjes, Ejup Maqedonci, ka pritur sot në takim anëtarët e Komitetit të Sigurisë dhe Mbrojtjes së Bundestagut gjerman.
“Ministri i Mbrojtjes, Ejup Maqedonci, sot mirëpriti në takim anëtarët e Komitetit të Sigurisë dhe Mbrojtjes të Bundestagut gjerman, të udhëhequr nga kryetarja e këtij Komiteti, Marie Agnes Strack Zimmermann. Gjithashtu, në këtë takim ishte Komandanti i FSK-së, gjenerallejtënant Bashkim Jashari, zëvendësministri i Mbrojtjes, Shemsi Syla, z.v.Sekretari i Përgjithshëm i MM-së, Gafurr Dugolli, atasheu ushtarak i FSK-së në Gjermani, nënkolonel Besim Gashi dhe shefja e Kabinetit të ministrit Maqedonci, Afërdita Zeqiri.”
Në këtë takim Maqedonci ka thënë se bazat ushtarake të Serbisë të vendosura përgjatë kufirit me Kosovën paraqesin kërcënim për stabilitetin e vendit dhe rajonit.
“Ministri Maqedonci njoftoi të pranishmit mbi situatën e sigurisë në vend. Veçanërisht, ministri theksoi kërcënimin që paraqesin bazat ushtarake të Serbisë, të vendosura përgjatë kufirit me Kosovën, për stabilitetin e vendit dhe rajonit, duke pohuar që duhet të ishte shqetësim për gjithë faktorin ndërkombëtar.”
Maqedonci i ka informuar anëtarët e këtij komiteti për kapacitetet aktuale që FSK ka për të garantuar mbrojtjen e tërësisë territoriale të Republikës së Kosovës dhe jetës së qytetarëve tanë.
“Po ashtu, ministri Maqedonci i informoi anëtarët e këtij Komiteti për kapacitetet aktuale që FSK ka për të garantuar mbrojtjen e tërësisë territoriale të Republikës së Kosovës dhe jetës së qytetarëve tanë. Ai ritheksoi se synimi ynë si shtet është anëtarësimi në NATO, sipas standardeve të së cilës aleancë po vazhdohet me implementimin e Planit Gjithëpërfshirës të Tranzicionit, ndërtimin e kapaciteteve profesionale dhe operacionale të ushtrisë tonë.”
Maqedonci ka shprehur mirënjohjen e Kosovës për mbështetjen e Gjermanisë, duke përmendur edhe praninë e shtuar të trupave gjermane në kuadër të KFOR’it.
“Në fund të takimit, ministri shprehu mirënjohjen për mbështetjen e gjatë të shtetit gjerman ndaj Republikës së Kosovës, praninë e shtuar të trupave gjermane në kuadër të KFOR-it, si dhe angazhimin e këtij Komiteti në drejtim të thellimit të bashkëpunimit ndërmjet vendeve tona në fushën e sigurisë dhe mbrojtjes, si dy shtete që ndajmë interesa të përbashkëta.”
