Geci ka thënë se përvoja që kanë marrë nga tërmeti në Shqipëri ka bërë që ta kenë më të lehtë të konstatohen shkaqet e dëmit. Ai ka publikuar edhe fotografi përmes së cilave ka thënë se shfaqen parregullsitë e ekzekutimit të punimeve.
“Kulmi përgjatë perimetrit të tij ka pasur strehë (shih foto 1.). Si pasojë e erërave, presioni i krijuar nën strehën e kulmit e ka nda konstruksionin e kulmit nga muri vertikal ku kulmi ka peshuar. Pas pamjeve dhe hulumtimeve në teren kemi hasur në shumë parregullsi të ekzekutimit të punimeve në konstruksionin e kulmit”, thuhet në raport.
Në pikën e dytë, arkitektët kanë konstatuar se karriget e kulmit kanë qenë të ndërtuara jashtë standardeve dhe nga materiali i dobët. “Mungonte ANKERIMI adekuat me fileta dhe profile metalike si dhe lidhjet e drurit sipas normave”, ka shkruar ai.
“Kapriatat apo konstrukcioni primar sipas dëshmive në teren rezulton të jetë i ekzekutuar mirë dhe si i tillë nuk është dëmtuar e as nuk është shkaktarë i dëmit”, ka vazhduar Geci në pikën tjetër të raportit.
Sipas tij, nga hulumtimi është parë se s’ka pasur “ASNJË ankerim i brinakeve por ato vetëm mbështeten mbi murin e jashtëm”. “Kjo është arsyeja kryesore pse erërat disa herë kanë dëmtuar këtë kulm”, ka thënë ai.
Geci ka thënë se edhe konstruksioni sekondar është i kapur me gozhda dhe jo fileta a profile adekuate metalike sipas normave. Ai ka thënë se edhe dritarja në kulm është jashtë normave a standardeve, apo jo e dedikuar për kulme.
“Kushdo që e ka ekzekutue këtë punë, mbikqyrësi dhe ai që e ka ba pranimin teknik jan’ flliqina e k’ti vendi! Pa pik’ morali e etike pune! Edhe me ju pas’ urdhnu me tytë pushke n’ball’ me ba kët’ vepër t’flliqt u dasht mos me ba sepse e keni dit’ SIGURT që dikon ka me marr n’qafë! Me ba deri n’kit nivel k’so “gabime” nuk asht punë mosdije por asht poshtërsi e papërgjegjësi e bane qëllimisht!” ka përfunduar ai.
Kjo nuk është hera e parë që objektit të ri i rrëzohet çatia. Një pjesë i është rrëzuar edhe në 2017-n, e banorë të lagjes i thanë KOHËS që e njëjta gjë ka ndodhur edhe më vonë.
Në gushtin e vjetëm Komuna e Prishtinës ka lidhur kontratë për rindërtimin e kulmit të objektit të ri. Kontrata është në vlerë 386 mijë euro dhe për periudhën prej 12 muajsh. Kësisoj, tenderi për rregullim ishte në afat të zbatimit kur u rrëzua kulmi.
Drejtori për Siguri dhe Emergjenca, Lulzim Fushtica, ka thënë të premten se objekti i Komunës së Prishtinës të cilit i ra kulmi të enjten nuk do të hapet derisa të bëhet vlerësimi i plotë që të mos ketë rrezik për qytetarët dhe punonjësit. Fushtica ka paralajmëruar se do të analizohen të gjitha faktet dhe do të bëhet vlerësimi i të gjithë objektit.
Ndërsa Policia e Prokuroria s’kanë dhënë informacione mbi hetimet për rënien e pullazit.
