Vuçiq: I kërkova QUINT-it që KFOR-i të merret me sigurinë në Veri, në vend të Policisë së Kurtit
Presidenti i Serbisë, Aleksander Vucic, është takuar sot me ambasadorët e shteteve të QUINT-it pasi një grup terrorist serb ka sulmuar Kosovën, duke vrarë një polic dhe duke plagosur dy të tjerë, shkruan Express.
Kreu i shtetit serb dhe ish-ministri i propagandës së Sllobodan Millosheviqit, ka thënë se ka kërkuar nga ta që KFOR-it të merret me çështjet e sigurisë në veri të Republikës së Kosovës në vend të Policisë së Kosovës.
“Përsërita qëndrimin e Serbisë për ngjarjet e fundit në Kosovë dhe kërkova që KFOR-i të kujdeset për të gjitha çështjet e sigurisë në veri të Kosovës në vend të policisë së Kurtit”, ka njoftuar Vuçiq në Instagram.
Ai tutje ka thënë se ka pyetur ambasadorët e QUINT se pse “ishte refuzuar EULEX-i” nga Policia e Kosovës për të marrë pjesë në operacionin e zhvilluar në veri.“E pyeta edhe pse EULEX-i ishte refuzuar nga policia e Kosovës për të marrë pjesë në vetë operacionin, i cili u zhvillua në territorin e veriut të Kosovës”, ka thënë ndër të tjera ai.
