Ministri i Punëve të Brendshme, Xhelal Sveçla, pasi ka arritur në Bare, në vendin ku janë kidnapuar tre policët kufitarë të Kosovës nga Njësia Speciale e Policisë së Serbisë, ka deklaruar se policia apo ushtria e Serbisë është futur në brendi të territorit të Kosovës rreth 600 metra.
“Serbia qartë po mundohet ta minojë rrugën tonë drejt shtet-ndërtimit të plotë, shtrirjen e sovranitetit në të gjithë territorin e Kosovës, që absolutisht s’do t’ia dalë, as të na ndalë e as të na sprapsë, sepse ne jemi në të drejtën tonë dhe do të veprojmë sipas ligjit”, teksa akuzoi Serbinë, e cila “vazhdon të rrezikojë jetën e zyrtarëve tanë, por edhe të qytetarëve tanë”.
Ministri Sveçla bëri të ditur se, pikërisht, në pikën kufitare në Merdare, po arrestohen qytetarët tanë .
“Kemi informacione paraprake për arrestime të qytetarëve tanë në pikën kufitare në Merdare”, deklaroi Sveçla.
