Pas ngjarjes tronditëse, presidentja Vjosa Osmani ka thirrur për sot mbledhjen e Këshillit për demokraci dhe të drejta të njeriut.
Në këtë takim, ku do të marrin pjesë të gjithë liderët institucionalë, pritet të dilet me qëndrime konkrete për masat që duhen ndërmarrë për parandalimin e dukurisë së vrasjes së vajzave dhe grave në Kosovë.
Osmani tha për RTK se si shtet dhe shoqëri jemi para një sfide serioze , sepse femicidi urgjentisht duhet të ndalet dhe nuk duhet të tolerohet.
“Në këtë takim përveç liderëve institucional do të marrin pjesë edhe udhëheqësit e institucioneve të drejtësisë, të sigurisë, përfaqësues të shoqërisë civile, të institucioneve të pavarura. Në agjendë janë dy pika konkrete: E para, secili institucionin të jetë në inputin e vet lidhur me mangësitë që ekzistojnë në sistemin tonë për mbrojtjen e jetës së vajzave dhe grave dhe e dyta do të dalim me përfundime dhe konkluzione konkretet se si të parandalojmë këto akte të dhunës dhe këtë femicid, sa më urgjentisht që të jetë e mundur. Shpresoj shumë që secili nga institucionet e Kosovës do të vijë me një listë veprimesh konkrete të cilat nënë ombrellën e Këshillit për demokraci dhe të drejta të njeriut dhe i cili do të mbikëqyrë zbatimin e tyre do të shtyhen përpara, duke kuptuar seriozitetin e kësaj situata jashtëzakonisht tronditëse për gjithë shoqërinë dhe shtetin tonë. Si shtet dhe shoqërisë jemi para një sfide serioze, sepse femicidi urgjentisht duhet të ndalet dhe nuk duhet të tolerohet”, tha Osmani.
I dyshuari për vrasjen për vrasjen e ish-gruas së tij shtatzënë në oborrin e QKUK-së mbrëmjen e së mërkurës, ndodhet ende në arrati.
Policia gjatë ditës së djeshme e ka shpallur në kërkim të njëjtin duke kërkuar edhe ndihmën e qytetarëve për ta kapur, shkruan Reporteri.net.
Ministri i Brendshëm, Xhelal Sveçla gjatë ditës së djeshme ka thënë se ka kërkuar angazhim maksimal të të gjithë zyrtarëve policorë për arrestimin e menjëhershëm dhe sjelljen para drejtësisë të Sokol Halilit.
Sveçla ka thënë se arrestimi dhe drejtësia janë urgjenca e këtij rasti.
Të njëjtit siç u raportua dje, i është gjetur vetura në sheshin “Ahmet Shtimja”. Policia tha se i dyshuari është kërkuar në disa lokacione, por ende nuk kanë arritur ta kapin.
