Kanë mbetur fiks një muaj deri kur qytetarët kanë kohë t’i konvertojnë në RKS targat ilegale të automjeteve të lëshuara nga Serbia. Sipas vendimit të marrë nga Qeveria e Kosovës, nga 1 shtatori deri më sot janë regjistruar vetëm nëntë vetura, ku janë konvertuar targat ilagale në RKS.
Kështu kanë konfirmuar përmes një përgjigje nga Ministria e Punëve të Brendshme.
“Numri i regjistrimit të veturave konform vendimit të qeverisë deri me sot ka arritur në 9”, ka thënë në përgjigjen e tyre nga MPB-ja.
E, se çfarë do të ndodhë me ata qytetarë që nuk i kthejnë veturat në RKS pas 31 tetorit kur përfundon edhe afati i vendosur nga Qeveria, në MPB ditë më parë patën thënë për Telegrafin se nuk do të lejohet qarkullimi në territorin e Republikës së Kosovës.
“Ndërsa pas datës, 31.10.2022, siç parasheh edhe legjislacioni në fuqi, qytetarët të cilët nuk i regjistrojnë veturat e tyre edhe pas afatit të përcaktuar nga Qeveria e Kosovës, do të llogariten si pronarë të veturave të paregjistruara dhe veturat e tyre nuk do të lejohen të qarkullojnë në territorin e Republikës së Kosovës, duke përfshirë këtu edhe pikë kalimet kufitare”, patën thënë nga MPB-ja.
Ndërkaq, dy javë më parë dy qytetarë të komunitetit serbë janë sulmuar pasi i janë bindur vendimit të Qeverisë për t’i konvertuar targat në RKS.
Sipas informacioneve të publikuara nga ministri i Punëve të Brendshme, Xhelal Sveçla, strukturat ilegale kishin djegur veturën e një oficeri serb, si dhe depon e një qytetari nga Zveçani.
E nëse situata mund të tensionohet sërish në veri, NATO-ja ka deklaruar se është e gatshme të rrisë numrin e trupave në Kosovë.
“Ne jemi vigjilentë dhe të gatshëm për të vepruar… nëse kemi rritje të tensioneve, mirëpo edhe mund të rrisim numrin e forcave rezervë… mund ta marrim këtë vendim brenda një kohe të shkurtër”, ka thënë zëvendëskomandanti i misionit të NATO-s në Kosovë (KFOR), Luca Piperni.
Ndryshe,vendimi për targa ishte paraparë të hynte në fuqi më 1 gusht, por u shty për një muaj pas incidenteve të armatosura që ndodhën në veri të vendit. Ky vendim për targat ka filluar të zbatohet nga 1 shtatori dhe qytetarët serbë kanë kohë deri më 31 tetor t’i rikthejnë targat e tyre të lëshuara nga Serbia në ato të Republikës së Kosovës.
